കേരള സമൂഹം: ഇന്ന് നാളെ

മലയാള ശാസ്ത്രസാഹിത്യ പ്രസ്ഥാനത്തിന്റെ സുവർണജൂബിലിയോടനുബന്ധിച്ച് അറിവിനെ ആയുധമാക്കാൻ ആഗ്രഹിക്കുന്ന, വായനയെ ഗൗരവമായെടുക്കുന്ന മലയാളികളുടെ പഠനത്തിനുതകുന്നവിധത്തിൽ ജനകീയശാസ്ത്രപ്രസ്ഥാനത്തിന്റെ വിവിധ പ്രവർത്തനമേഖലകളെ സംബന്ധിച്ചുള്ള പുസ്തകങ്ങളും മറ്റു വൈജ്ഞാനികഗ്രന്ഥങ്ങളും ഉൾക്കൊള്ളുന്ന സുവർണ ജൂബിലി ഗ്രന്ഥാവലി എന്ന പരമ്പരക്ക് പരിഷത്ത് രൂപംനൽകിയിരുന്നു. ഗ്രന്ഥാവലിയിലെ നാലാമത്തെ പുസ്തകമായി  2007ലാണ്  ‘കേരള സമൂഹം: ഇന്ന് നാളെ’ എന്ന പുസ്തകം ആദ്യമായി പ്രസിദ്ധീകരിച്ചത്. കേരളത്തിലെ പ്രമുഖ ചരിത്ര പണ്ഡിതന്മാരിലൊരാളായ ഡോ. കെ.എൻ.ഗണേശാണ് ഈ പുസ്തകം രചിച്ചിരിക്കുന്നത്. അദ്ദേഹത്തിന്റെ ‘കേരളത്തിന്റെ ഇന്നലെകൾ’  എന്ന പ്രൗഢ ഗ്രന്ഥത്തിന്റെ തുടർച്ചയായി ഇതിനെ കാണാവുന്നതാണ്. ഇത് ഒരു അക്കാദമിക ചരിത്ര ഗ്രന്ഥമല്ല. അതുകൊണ്ട് തന്നെ ഉദ്ധരണികളുടെയും അടിക്കുറിപ്പുകളുടെയും അകമ്പടിയോടെ അഭിപ്രായങ്ങളും നിഗമനങ്ങളും അവതരിപ്പിക്കുന്ന സാധാരണരീതി ഇതിൽ കാണില്ല. കാലാനുക്രമത്തിലോ സംഭവാനുക്രമത്തിലോ കേരള ചരിത്രം അവതരിപ്പിക്കുന്ന ഗ്രന്ഥവുമല്ല ഇത്. വർത്തമാനകാല കേരളത്തിലെ മൂർത്തമായ പ്രശ്നങ്ങളെ അത്യന്തം സൂക്ഷ്മതയോടും ചരിത്രബോധത്തോടും കൂടി അപഗ്രഥിച്ച് അവതരിപ്പിക്കുകയാണ് ഇവിടെ ചെയ്യുന്നത്. 

രചന ഡോ കെഎൻ ഗണേഷ്